३० असार, विराटनगर । सुनसरीको हरिनगर गाउँपालिका- ६ मा भिनाजुले गोली प्रहार गरी एक १८ वर्षीय किशोरी अर्सी खातुनको हत्या गरेका छन । आइतबार राति करिब १ बजे गोली प्रहार गरी उनको हत्या भएको हो ।
किशोरीलाई उनकै भिनाजुले गोली प्रहार गरेको प्रारम्भिक अनुसन्धानका क्रममा देखिएको सुनसरी प्रहरी प्रमुख प्रहरी उपरीक्षक सुमनकुमार तिम्सिनाले जानकारी दिए ।
भारतको पत्राहा पञ्चायत-१६ घुर्नामा बसोबास गर्ने २९ वर्षीय आजात मिया जटले आइतबार राति करिब १ बजे किशोरीको टाउकोमा गोली प्रहार गरेका थिए भने १८ वर्षीय किशोरी अर्सी खातुनको घटनास्थलमै मृत्यु भएको थियो ।
घटनास्थलमा एउटा खोका फेला परेको छ भने बाकी अनुसन्धान भाई रहेको तिम्सिनाले जानकारी दिए । घटनास्थल भारतीय सीमा क्षेत्र नजिकै पर्छ । घटनापछि आजात मिया जट फरार छन् । फरार भएका मियाको खोजी भइरहेको र गोली प्रहारको कारण खुलिनसकेको सुनसरी प्रहरी प्रमुख प्रहरी उपरीक्षक सुमनकुमार तिम्सिनाले जानकारी दिए ।
